Baptist English High School

Tule tu’a TBA compound sunga um Baptist English High School (BEHS) hi atila chu Baby School ana kiti ahi. Hiche school hi 1967 kuma Pu. Thangkhochon Thomsong’in TBA compound pam lama ana phudoh ahin, private property anahi. 1970 kumin Baby School chu kehletnin ana umin, Bolsang kho’a Branch school ana kihongin ahi.

Pakai kum 1981 chun anaphutdoh’a Pu. Thangkhochon’in Baby School, Motbung chu TBA henga manlhom chan anapedoh tan ahi. Hiche’a kon chun Baby School chu TBA property ahung hi panin, School jeng jong chu TBA compound sunga chonlut ahung hitai.

School chu 1984 kumin athah beh’a suhdet ahung hin, amin jengjong Baby School’a konin Baptist English High School (BEHS) tin ahung kikhel tai. BEHS dinga Head Mistress masapen chu Nl. Phalkho ahi. 1989 kuma patchun Board of Secondary Education, Manipur’in recognised hina noija Class X gei simna thei ahung hitan ahi.

Baptist English High School chu kehlet ahunghin, 1990 kumin Thenjang vangkho’a Baptist School hondoh anahi. Baptist English School Thenjang hi aumjing nalaijin, hinlah TBA vetsuina noija um talouvin, Thenjang Houbung vetsuina noijoh’a aumtai. TBA ‘in Baptist School Branch khat jong Songpijang kho’a 1991 kumchun anahong doh’in, chuleh 1992 kumchun jong Harup kho’a jong Branch School ana hongin ahi. Hinlah vangset umtah’in Kuki-Naga gal jeh’in Songpijang le Harup Baptist School chu suhmangin aum paitan ahi.