Houbung mite Pathen thu hetna lama khantousah’a Christian Education Department hi 1965 kuma ana kiphutdoh ahin, Department Secretary masapen chu Helien Kipgen anahi. Hiche Department hin chapang neocha’a pat tehse geijin Sunday School’a ajil ding lekhabu tampi asemdoh’in, ahomdoh tan ahi.
Pathen thu hetna goh hilouvin leilam hetna jong akhohsah jeh’in Christian Education Board of CBCNEI leh Board of Secondary Education Manipur (BSEM) affiliation noija Baptist English High School hi 1984 kuma Association campus sunga ana phutdoh’in ahi. Ngulhao Theological Seminary (NTS) jonghi Education Department vetsuina noija uma anahin, tunvang autonomous ahitai.
Christian Education Board’in anatoh hi Karbi-Anglong, Assam, leh Myanmar geijin akeh lenin ahi. Pathen thu lama khantoube nadingin Education Board’in Sunday School Training, Pastors Training chule Seminar dang dang jong kumseh’in agong jingin ahi. Sunday School goh hilouvin Houbung mihon Pathen thu ahetbena dingun Education Department hin kumsehle Bible Quiz abol jingin, kipaman hoitahtah jong ahomdoh jin ahi.
